انشهد اني عقب جوعي تعشيت ...

السلام عليكم ورحمة الله وبركاته

الله يمسيكم بالخير وشلونكم يالربع
يابو مخلد يقولون فيه عندك سالفه عن ذيب سرى وتعشى في ضلع مهوب بعيد عن منازل قوم عندهم له معشى
ايه ابشروا ابشروا بها لكن يالربع ترى القصص القديمه جت على السنة الرواة وحفظت وكثير منها ما انكتب الا بعد ما اختلفت الروايات وهذي قصة برواية ويمكن تجدون لها رواية اخرى المهم الاساس في القصة
القصة وما فيها احم احم عطوني ماء لاهنتوا واذكروا الله شرقت اللهم الا لاحول ولا قوة الا بك اعوذ بالله من شياطين الجن والانس اذكروا الله
هني هني هني هني هين الله يهنيكم بالايمان وطاعة الرحمن الحمد لله الذي احياني بعد اذ اماتني واليه النشور

السالفه اسمعوها ولا احد يقاطعني وتراي ماشهدتها ولا عندي منها الا ما بتسمعون صلوا على النبي
اضطر رجل لمفارقة زوجته بعد خلاف بين قبيلتيهما ولكن الشوق دفعة ذات ليلة لزيارتها عند اهلها وعند الاقتراب من المنازل قلد عواء الذيب ثلاث مرات فعرفت صوته وخرجت له خفيه وبعد اللقاء الشرعي الزوجي عاد الرجل لقبيلته وشاء الله ان تحمل الزوجه من جراء
اللقاء ولكن اهلها لم يصدقو روايتها بانها حامل من زوجها مما دعاهم لدعوته للتأكد من ذلك وحضر المجلس ناس
واجد من جماعتهم.. فقام شقيقها بالعزف على الربابه بهذه البيتين :

ياذيب ياللي تالـي الليـل أعويـت
ثلاث عوياتٍ على ساق وصلاب
سايلك بالله عقبها ويـش سويـت
يوم الثريا راوست والقمر غاب

الناس احتارت وش سبب هالبيتين لافيه محاوره ولا للبيتين عندهم معنى ولكن الزوج عرف المقصد ورد مباشرة على البيتين بقوله :

أنا اشهد اني عقب جوعي تعشيـت
واخذت شاة الذيب من بين الاطناب
على النقا .. والا الـردى ماتهقويت
أدّو ، حلالـي ياعريبـيـن الانـسـاب

قال اخو البنت اشهدوا يالربع هذا ماصار وهذا ماصار وهي زوجته على سنة الله ورسوله من قبل وهذا ماصار
وانت خذ زوجتك والله يستر عليكم
وسلامتكم
وانت سالم وغانم
اسمحولي يالربع باسري
فمان الله
فمان الله
تصبحون على خير
والساري بخير

سلمان النمشان

->إقراء المزيد...